“Dövlət və Mədəniyyət” mövzusunda interaktiv mühazirə

OL! Azərbaycan Gənclər Hərəkatı fevralın 17-də daha bir interaktiv mühazirəsini gerçəkləşdirdi. “Dövlət və Mədəniyyət” mövzusunda keçirilən mühazirənin qonaqları filosof Ağalar Məmmədov və kultroloq “Simurq” Azərbaycan Mədəniyyət Assosiasiyasının prezidenti Fuad Məmmədov olub.

Mövzuyla bağlı ilk fikirlərini filosof Ağalar Məmmədov bildirib. O deyib ki, Azərbaycan daha çox İslam mədəniyyətinə yaxınlığı ilə seçilir. Lakin mədəniyyət adı ilə qəbul etdiyimiz bir çox şey əslində İslamda olmayan məsələlərdir. Ağalar bəy insanların saxta dini dəyərlərdən qaçmasını, yersiz şükür hissindən uzaq olmalarını və Qərb mədəniyyətinə yaxınlaşmasını vacib olduğunu bildirib.

Kulturoloq Fuad Məmmədov isə elmsiz mədəniyyət və ya mədəniyyətsiz elm barədə danışıb. Kulturoloq hesab edir ki, bu iki amil bir birindən ayrıla bilməz. O, həmçinin Şərq xalqlarının istiqanlı olmasından, amma çox zaman bu istiqanlılığın yanlış nəticələrindən bəhs edib. Sitat: “Bizdə böyüyə hörmət ciddi məsələdir. Amma bəzən böyüyə hörmət rüşvət kimi fəsadlar doğurur”.

Çıxışların ardından gənclərin sualları cavablandırıldı. Bəzi gənclər Şərq mədəniyyətindən tamamilə imtina edib, Qərbə doğru yönəlməyi düzgün addım həsab etmədilər. Amma yekdilliklə vurğulandı ki, Şərq və Qərb mədəniyyətlərinin insana dəyər verən bütün yönlərini öyrənmək və yaşatmaq lazımdır.