Adnan haqda Hikmətli sözlər

Hikmət Hacızadə oğlu, həbsdə saxlanılan bloqqer Adnan haqda danışır. Ülviyyə Əsədzadənin videosüjeti

http://www.azadliq.org/video/3273.html

Hikmət Hacızadə oğlu haqqında...

Ülviyyə Əsədzadə

Adnan Hacızadə. Dostları onun ictimai fəaliyyətini daha çox belə xarakterizə eləyirlər – «OL!» Gənclər Hərəkatının həmtəsisçisi, axır vaxtlar fəal gənclərin keçirdiyi etiraz aksiyalarının və internetdə yayımlanan ictimai motivli, satirik videokliplərin ideya müəllifi...

Elə Adnanın həbsiylə bağlı həm Qərb, həm də yerli mətbuatın əsas versiyası budur - Adnan Hacızadə və dostu Emin Milli məşhur «Eşşəklə müsahibə» satirik videosüjetinə görə həbs olunub. Hüquq mühafizə orqanları bu iddianı rədd edir. (Süjetə mətnin sonunda baxa bilərsiz) Bu haqda bir azdan...

... «Adnan «Müsavat» Partiyasının işinə o qədər də qarışmır, partiya işləri ilə maraqlanmır».

Bunu «Azadlıq» Radiosuna həbsdəki gənc fəal Adnan Hacızadənin atası, Müsavat Partiyası Divan üzvü Hikmət Hacızadə danışır:

- Adnan hesab edir ki, partiya daha çox yaşlı nəsildir, onun öz dairəsi, öz dostları var, onun fikrincə, gənclər öz siyasətlərini, öz davranışlarını özləri müəyyənləşdirməlidirlər.

- Müsavatın mitinqlərinə gedirdi?

- Özü istəyəndə, bəli. Bir vətəndaş kimi. Bizdə elə şey yoxdur ki, mən götürüm aparım. Amma Adnan uşaqlıqdan fəal olub. Məktəb vaxtı təbii ki, elə bir ictimai fəaliyyəti yox idi. Universiteti bitirəndən sonra öz yolunu seçdi.

- Siz 20 ildən çoxdur ki, Müsavat Partiyasındasız, bir dəfə də həbs olunmamısız. Sizcə, Adnanın həbsinin sizinlə bağlılığı varmı?

- Əlbəttə ki, var. Görünür, bəzi insanları mən, mənim ailəm qıcıqlandırır. Mən Adnana dəfələrlə demişdim ki, oğul, ictimai fəaliyyətlə məşğul olursan, ol, amma ehtiyatlı ol!

- Adnan siyasətçidirmi?

- Yox, Adnan ictimai fəaldır. «Eşşək müsahibəsi» siyasətdirmi? Yox! Onun istəyi Azərbaycanda demokratiyanın bərqərar olmasıdır.

ŞƏHƏRDƏ ÜÇ-ÜÇ GƏZƏNLƏR

...Bu ilin mayın 28-də günorta vaxtı şəhərdə üç –üç gəzən ağ köynəkli gənclər gözə dəyir. Onlardan birinin köynəyinə «A», birinə «D», birinə «R» yazılmışdı. «ADR bizi birləşdirir!» aksiyasının müəllifi də Adnan Hacızadə idi. Həmin gün 16 nəfər gənci bir neçə saatlığa həbs elədilər.

Dostlarının dediyinə görə, Adnan aktiv ictimai fəaliyyətə 2003-cü ilin prezident seçkiləri vaxtı başlayıb. Amma internetdəki şərhləri, forumlarda iştirakı ilə.

«Ol!» bloqunun İdarə Heyətinin üzvü Pərvanə Persiani danışır ki, 2005-ci ildə Adnan Hacızadənin Amerikadan qayıdışı Azərbaycanda Parlament seçkiləri ilə eyni dövrə düşür.

Adnan müxalifətin mitinqlərində yenə də sıravi kimi iştirak edir. Həmin dövrdə «Ol!» Gənclər Hərəkatını yaratmaq ideyası müzakirə olunur. 2006 –cı ildə «Ol!» yaranır.

BİR DAHA «EŞŞƏK» HAQDA...

«OL!» Hərəkatı daha çox öz bloqu, xüsusilə də videosüjetlərinə görə axır vaxtlar daha çox məşhurlaşıb.

İndiyə kimi bloqda «Çünki mən Azərbaycanlıyam!» başlıqlı videoseriyada tənqid hədəfi görüntü xatirinə 400 manatlıq telefon gəzdirən, amma iki manatlıq kontur ala bilməyən, «qıza sataşmaq istəyirsən, get başqa yerdə sataş, bizim məhəllədə sataş» düşüncəsiylə yaşayan gənclər idi.

«Eşşəklə müsahibə» demək olar ki, bloqda siyasi hakimiyyətin qərarlarını hədəfə alan, hətta həbsə qədər də xeyli məşhurlaşan birinci videosüjetdir. «Ol!»un süjetləri minlərlə auditoriyası olan qruplarda, «Facebook» sosial şəbəkəsində, «Youtube»da yerləşdirilir.

Türkiyənin «Hürriyyət» qəzeti 16 iyul tarixli sayında Adnanın həbsi barədə yazır:

«Azərbaycanda büdcə pulu hesabına xaricdən eşşək idxalına etiraz məqsədilə videoklip hazırlayan gənclər həbs olundu».

Birləşmiş Ştatlarda çıxan «Nyu –York Taymz» qəzeti yazısına belə başlıq qoyur: «Eşşək geyimi həbslə nəticələnir».

«OL!» Hərəkatının üzvü Pərvanə Persianı «Azadlıq» Radiosuna deyir ki, «Eşşəklə müsahibə» süjetində onların məqsədləri ancaq bu idi ki, büdcədən 100 min dollardan çox pul ayrılıb Türkiyədən və Almaniyadan bahalı eşşək gətirilməsinə, QHT-lərlə bağlı qanunu dəyişmək cəhdinə münasibət bildirsinlər.

«CƏNAB EŞŞƏK», yoxsa «CƏNAB PREZİDENT»?

Yerli media yazır ki, Adnanın həbsinə bir səbəb də odur ki, eşşəyə müraciətlə almanca deyilən «Esen Heinz» (cənab eşşək) sözü «cənab prezident» kimi tələffüz olunub, amma «Ol!»çular bu fikri tamamilə rədd edirlər.

VƏTƏNDAŞ JURNALİSTİKASI?

Media üzrə ekspert Zeynal Məmmədli deyir ki, «Ol!» bloqunun fəaliyyətini «yeni media» – vətəndaş jurnalistikası adlandırmaq olar: «Yeni medianın iki qolu var: 1) peşəkar media vətəndaşların köməyindən istifadə edib, media materiallar hazırlar. 2) vətəndaşlar özləri ictimai fəal olurlar, cəmiyyətdə baş verən hadisələrə münasibət bildirirlər. Adnan Hacızadənin və «Ol!» bloqunun işini ikinci hal kimi xarakterizə etmək olar.

«OL!»UN MALİYYƏ MƏNBƏLƏRİ

«OL!» hərəkatının üzvü Turqut Qəmbər «Azadlıq» Radiosuna danışır:

- Maliyyə mənbəyiniz nədir?

- Üzvlük haqları vasitəsilə. Təşkilatın 20-30 aktiv üzvü var.

- Sizin «Diplomat» oteldə ayda iki dəfə debatlarınız, ayrı-ayrı görüşləriniz olur, bu tədbirlər necə maliyyələşir?

- Üzvlər bütün tədbirləri öz hesabları hesabına keçirirlər. Öz aramızda pul yığırıq.

- Mühazirələrinizə maraq varmı?

- Biz çalışırıq ki, müxtəlif məsələlərlə bağlı debat imkanı yaradaq, bütün tərəflərə söz verək. Yaxşı halda, bizim debatlara 100-ə qədər dinləyici gəlir. Bunların arasında tələbələr daha çoxdur. Biz müxtəlif sahələrin mütəxəssislərini ictimai əsasla mühazirəçi kimi dəvət edirik.

- İndiyə kimi qrant almısınızmı?

- Bir qrant layihəmiz olub, onu da NED (National Endowment for democracy) təşkilatı maliyyələşdirib, 2007-2008-ci ildə. Bu da insan haqları ilə bağlı layihə idi.

GƏNCLƏRİN MANİFESTİ

«OL!» Gənclər Hərəkatı öz bloqundakı manifestində özü haqda yazır:

«Ol!» Azərbaycan Gənclər Hərəkatı qeyri-siyasi, ictimai hərəkatdır. «Ol!» Hərəkatının əsas məqsədləri müstəqil, sərbəst, məsuliyyətli gəncliyin formalaşması, gənclərin mədəni, elmi və digər qeyri-maddi tələblərinin təmin edilməsi, onların maariflənməsi və peşəkar cəhətdən özlərini doğrultmasına yardımçı olmaqdır.
Gənclərin ictimai proseslərdə fəal iştirakı həm də vətəndaş cəmiyyətinin formalaşması üçün əsas şərtlərdən biridir».

http://www.azadliq.org/content/article/1778710.html

Emin Milli kimdir?

Ülviyyə Əsədzadə

Emin Milli informasiya blokadasını yaracağını, Azərbaycanda dəyişiklik ideyalarını yayacağını 2008-ci ilin noyabrında elan edir - Avropada Təhsil alan Azərbaycanlı Tələbələrin Forumunun (FASE) London toplantısında.

LONDONDA «DƏYİŞİKLİK MANİFESTİ...»

Emin Milli 2006-cı ildə FASE-ni yaradanlardan biri olub. İki il sonra London Forumunda Milli deyirdi:

«İstəyirəm mənim və sizin uşaqlarınız bilsinlər ki, Azərbaycan Xalq Cümhuriyyətinin irsinə hörmət etmək, «Azadlıq» Radiosuna qulaq asmaq niyə vacibdir, istəyirəm olanlar bilsinlər ki, bir nəfərin iki dəfədən artıq prezident seçilmədiyi sistemə malik olmaq, monopoliya və korrupsiyanı aradan qaldırmaq niyə mühümdür».

Emin Milli elə bu forumda elan edir ki, bütün bu fikirlərini ictimaiyyətə yaymaq üçün FASE-dən gedir.

AZI 5500-lük AUDİTORİYA VƏ MÜASİR MAARİFÇİ

Təkcə «Facebook» sosial şəbəkəsində Emin Millinin 3000-dən çox «dostu» var – həmin adamlar hər gün onun yayımladığı məlumatları alırdılar.

Emin Milli daha çox demokratiya, insan haqları ilə bağlı məlumatları yerləşdirirdi.

Ən məşhur yahoo-email qruplardan sayılan «AStudents» qrupunu da Emin Millinin həmtəsisçisi olduğu AN şəbəkəsi yaradıb. «AStudents»in 2500-dən çox üzvü var.

Emin Milli gündə bir neçə dəfə «AStudents»ə məlumat göndərirdi.

«EMİN CƏMİYYƏTDƏ DƏYİŞİKLİYİN FİLOSOFUDUR»

Emin Milli siyasətçidirmi? Bu suala onun dostları birmənalı cavab verirlər - Xeyr! Onun hakimiyyətə heç bir iddiası yoxdur. AN şəbəkəsinin həmtəsisçisi Elnurə Civəzadə deyir:

«Emin cəmiyyətdə dəyişikliyin filosofudur».

Amma dostları deyirlər ki, Emin Milli qeyri-zorakılıqla, maarifçiliklə dəyişikliyin tərəfdarıdır, zorakılıqla yox.

HƏYAT YOLDAŞININ DEDİKLƏRİNDƏN...

Emin Millinin həyat yoldaşı Leyla Kərimli ABŞ-ın Kolumbiya Universitetində doktoranturada oxuyur. Dediyinə görə, Emin Milli indi heç yerdə rəsmi işləmir, ancaq müxtəlif ictimai görüşlərdə mühazirə deyir və müstəqil tərcüməçiliklə məşğuldur.

Leyla Kərimli «Azadlıq» Radiosuna danışır:

-Emin ideya adamıdır. Çox adam var ki, karyera güdür, pul fikirləşir, amma Emin elə deyil, onun üçün əsas Azərbaycanda müstəqil düşünməyi bacaran və Azərbaycanın gələcəyinin parlaq olmasını təmin edəcək gənclərin olmasıdır.
-«Yeni Müsavat» qəzeti yazır ki, Emin Milli Amerikanın əli ilə Azərbaycanda çevriliş planı, «narıncı inqilab» hazırlayırmış...

-Bu, nonsensdir. Mən bilmirəm bu məlumatı haradan alıb yazıblar. Emin heç kimin adamı deyil, ona neçə dəfə təklif ediblər ki, qalsın xaricdə işləsin, razılaşmayıb. Bir də inqilab hazırlayan adam niyə görə BMT-nin qarşısında açıq-aşkar aksiyalar keçirməli idi. Yəni, «Yeni Müsavat» professionallıq iddiasındadırsa, onda boşboğazlıqla yox, konkret faktlara istinad edən məlumatların çapı ilə məşğul olsunlar.

«Yeni Müsavat» qəzeti 14 iyul sayında yazır ki, Emin Milli və həbs olunan başqa yoldaşı Adnan Hacızadə Amerikanın Azərbaycanda «narıncı inqilab» planının icraçıları imişlər.

EMİN MİLLİNİN AMERİKA SƏFƏRLƏRİ

Həyat yoldaşı Leyla Kərimlinin verdiyi məlumata görə, Emin Milli Birləşmiş Ştatlara birinci dəfə 2001-ci ildə gedib.

New York State University-də «Avropa Qərar Qəbulu prosesi» mövzusunda tələbə konfransında iştirak edib. Bu, onun Saarbrukende oxuduğu dövrdə baş verib. Leyla Kərimli deyir ki, bir dəfə hətta Emin Milli Dövlət Gömrük Komitəsinin və Prokurorluğun işçiləri üçün tərcüməçi kimi ABŞ-a gedib.

2008-ci ilin avqustundan bu yana Emin Milli həyat yoldaşını görmək üçün bir neçə dəfə Amerikaya gedib. Bunu da Leyla Kərimli deyir.

CV

Emin Milli (Abdullayev) 1979-cu ildə Bakıda doğulub, 1999-cu ildə Bakı Dövlət Universitetinin Beynəlxalq Hüquq və Beynəlxalq Münasibətlər fakültəsini bitirib, Almaniyada Avropa Saarbruecken Hüquq Məktəbində magistr dərəcəsi alıb.

O, 1999-2000-ci ildə Bakıda (International Republican Institute (IRI)) Beynəlxalq Respublikaçılar İnstitutunda koordinator, 2002-2004-cü ildə Friedrich Ebert Fondunun Azərbaycan üzrə direktoru işləyib.

2002-2004-cü illərdə həm də Avropa Şurasının Azərbaycanda siyasi məhbuslar üzrə hüquqşünası və məsləhətçisi olub.

2005-ci ildə Emin Milli ATƏT Demokratik Təsisatlar və İnsan Haqları Bürosunun seçki müşahidə missiyasının siyasi təhlilçisinin köməkçisi işləyib.

AN ŞƏBƏKƏSİ

Yuxarıdakı bioqrafik məlumatları «Azadlıq» Radiosuna Emin Millinin yoldaşlarından biri Elnurə Civəzadə verib. Civəzadə deyir ki, Emin Milli 2005-ci ildə xaricdə oxuyan məzunlarla bir yerdə Alumni Network (Məzunlar Şəbəkəsi)ni-AN şəbəkəsini yaradır və gənclərin xaricdə təhsil alması uğrunda məsləhətlər verməyə başlayır. AN şəbəkəsi qeyri-hökumət təşkilatı deyil, heç bir layihə həyata keçirmir, ofisi və ayrıca strukturu, sədri yoxdur, heç vaxt qrant almayıb, məqsədi informasiya mübadiləsidir.

BAKI UNİVERSİTETLƏRİNDƏ İMZATOPLAMA KAMPANİYASI KEÇİRİR

...2005-ci ildə Emin Abdullayev özünə «Milli» təxəllüsünü götürür və dostlarının dediyinə görə, bundan sonra daha ciddi ictimai fəaliyyətə başlayır. Dostları deyir ki, bu təxəllüsün «millətçilik»lə əlaqəsi yoxdur.

2005-ci ildə Emin Milli Bakı universitetlərində imzatoplama kampaniyasına başlayır. İdeya bu olur ki, neftdən gələn vəsait hər il xaricdə 5 min tələbənin təhsil almasına yönəldilsin. Milli minlərlə imza toplamağa nail olur, amma elə həmin il prezident fərman imzalayır ki, neft pulları hesabına xaricə tələbə göndərilsin. Amma hər il 5 min yox, müəyyən dövr ərzində 5 min.

Yuxarında dediyimiz kimi 2006-da Emin Milli FASE-ni yaradanlardan biri olur, 2008-də FASE-dən gedir və özünün dediyi kimi internetdə informasiya blokadasını yarmağa çalışır. Amma mübarizə təkcə virtual məkanla məhdudlaşmır. Emin Milli Bakının küçələrinə də çıxır.

HƏR ŞEY BİR DƏSTƏ GÜLLƏ BAŞLADI

Media Emin Milli haqqında keçən ildən yazmağa başladı. 2008-ci ilin mayın 28-də Emin Milli bir neçə yoldaşı ilə birgə şəhərin mərkəzində, Azərbaycan Xalq Cümhuriyyətinin banisi Məhəmməd Əmin Rəsulzadənin büstü qoyulmalı olan, əvəzində fontan tikilən yerə gül dəstəsi qoymağa cəhd eləyir, polis onu bir neçə saatlığına saxlayır.

KULMİNASİYA: AMERİKADA AZƏRBAYCANLILARIN ETİRAZI

Bu ilin yanvarında Amerikada yaşayan azərbaycanlılar Konstitusiyada dəyişikliyə etiraz kimi Nyu-Yorkda, BMT-nin baş ofisinin qarşısında aksiya keçirdilər, bir nəfərə ömürlük prezidentlik şansı verən düzəlişə etiraz etdilər. Emin Milli həmin aksiyanı təşkil eləyən AZAD adlı təşkilatının təşəbbüs qrupunun üzvü idi.

2009-cu ilin aprelində Emin Milli ABŞ-ın Kolumbiya Universitetində Azərbaycanda Konstitusiya dəyişikliyinin əleyhinə kəskin tənqidi çıxış edir.

GÜL BAYRAMINA CÜT QƏRƏNFİLLƏ...

Polis Emin Millini axırıncı dəfə bu ilin mayında, mərhum prezident Heydər Əliyevin ad günündə saxlamışdı. Həmin vaxt Milli tərəfdaşları ilə bir yerdə Neft Akademiyasında həlak olan 12 nəfərin xatirəsinə matəm elan olunmamasına etiraz kimi cüt qərənfillə gəlib «gül bayramı»nın keçirildiyi yerdə dayanmışdı. «Gül bayramı» mərhum prezident Heydər Əliyevin ad günündə, 10 mayda keçirilirdi. Polis Millini başqa etirazçılarla bir yerdə bir neçə saat saxlamışdı.

VƏ NƏHAYƏT «LİVAN» RESTORANI

2009-cu ilin iyulun 8-də Emin Milli özündən başqa altı dostu ilə bir yerdə «Livan» restoranının barında oturubmuş, dostlarının iddia etdiyinə görə qonşu stoldan ona hücum olur və Milli, dostu Adnan Hacızadə döyülür. Onlar polisə şikayət etdikdə isə özlərini xuliqanlıqda təqsirli bilib saxlayırlar. Daxili İşlər Nazirliyi və Baş Prokurorluğun birgə bəyanatında isə göstərilir ki, onlar barda ucadan etik normadan kənar nalayiq ifadələr işlədiblər, bardakı başqa iki nəfər- Vüsal Məmmədov və Babək Hüseynov Emin Milliyə və dostlarına irad tutmaq istəyiblər, amma Emingil həmin iki nəfərə qarşı zor tətbiq ediblər.

«EMİN MİLLİ KİMİ GƏNCLƏRİN İLHAM ƏLİYEVƏ BÖYÜK ÜMİDLƏRİ VAR İDİ...»

Siyasi şərhçi Rauf Mirqədirov deyir ki, Emin Milli kimi gənclərin 2005-ci ilə qədər prezident İlham Əliyevə böyük ümidləri var idi, onlar Əliyevi xarici dilləri bilən, dünyagörüşlü lider hesab edirdilər: «Amma 2005-ci ildən sonra, azadlığın çərçivəsi daraldıqca, belə gənclər çox məyus oldular. Onlar yeni metodlardan, informasiya texnologiyalarından istifadə edərək yeni mübarizə üsulu seçdilər».

«MÜXALİFƏTDƏN DƏ TƏHLÜKƏLİ»

Rauf Mirqədirov deyir ki, indi belə gənclər hakimiyyət üçün müxalifətdən daha təhlükəlidir, çünki indiyə qədər müxalifətin gənclər təşkilatları arasındakı gənclər vətənpərvərdirlər, amma bəzən savadları çatışmırdı, amma Emin kimi gənclər həm vətənpərvərdir, həm də onlar xaricdə təhsil aldıqlarından imkanları genişdir: «Odur ki, hakimiyyət belələrini virtual auditoriyasının artmasından narahatdır».

Yeni Azərbaycan Partiyasının icra katibi Əli Əhmədov mətbuata müsahibəsində deyib ki, Emin Millinin həbsi siyasi xarakterli deyil və məsələ siyasiləşdirilməsin.

Prokurorluq və Daxili İşlər Nazirliyi isə Milli və onunla birgə tutulan Adnan Hacızadənin həbsini pisləyən xarici səfirliklərə müraciət ediblər ki, istintaqın işinə qarışmasınlar.
«Sərhədsiz Reportyorlar» Birliyi Emin Millini «bloqçu» kimi təqdim edir, amma Azərbaycanda Emin Millini bloqçu kimi yox, daha çox forumlarda, sosial şəbəkələrdə məlumat yayan adam kimi tanıyırlar.

http://www.azadliq.org/content/article/1777197.html

Adnanın anasına məktub

Səadət Cahangir

Sizinlə şəxsən tanış deyilik. Amma Adnanı tanımaq ailəni yaxından tanımağa bəs eləyib. Sizi özümə doğma hiss etdiyim üçün pafoslu sözlər işlətməyəcəm. Bunu isə mütləq deməliyəm: belə oğlunuz olduğu üçün yalnız qürur duya bilərsiniz!

Bir ana üçün övladının haqsız həbs olunması nə deməkdir, gözəl anlayıram. Amma Adnan baxışları, görüşləri, əqidəsi ilə bizim hamımızın ailəsindən sayılır. Ona görə də, yalnız olduğunuzu düşünməyin! Bilirsiniz, məmləkətdə ən fəal intellektualları “xuliqanlıq” maddəsiylə həbs edirlər...

Sizə Uyğur türklərinin lideri Rəbiyə Qadiri misal çəkmək istəyirəm. Öz xalqının hüquqları uğrunda mübarizə apardığı üçün 6 il məhbəsdə yatıb. “Vətənə xəyanət”də ittiham olunan həyat yoldaşı mühacirətə qaçmaq zorunda qalıb. Kommunist rejimi ailənin başına olmazın müsibətlər gətirib. Hazırda Amerikada sürgün həyatı yaşayan Rəbiyə Qadirin 65 yaşı var. Üç oğlu Çində həbsxanada, iki qızı ev dustağıdır. Vaxtı ilə ölkənin ən zəngin qadınlarından olan Rəbiyə xanımın bütün sərvətini əlindən alıblar. Amma rejimin ürəyi yenə soymur. Hazırda Urumçidə qətl edilən Uyğurların qanına görə özünü deyil, Rəbiyə Qadiri günahkar sayır. O isə şantajdan çəkinmədən, “azadlıq davasına xidmətim davam edəcək” deyir.

Məgər, Uyğur problemi sırf milli məsələdir? 1989-cu ildə zirehli tankları öz xalqının üstünə yeridib minlərlə insanın həyatına son qoyan bu rejim deyildimi? Bəli, Çində Uyğurlara olan münasibətlə müxalif fikirli çinlilərə olan münasibət heç nəylə fərqlənmir. Çünki dünyanın hər yerində diktaturaların mahiyyəti insan ləyaqətini alçaltmağa yönəlir. Bu sistemi yönəldənlərin də ləyaqətli insanları görməyə gözü yoxdur.

Rəbiyə Qadirin adını təsadüfi çəkmədim. Sadəcə, onun timsalında dünyada bizdən daha fədakar dava adamlarının olduğunu xatırlatmaq istədim. Bir məqama diqqət edin...O, yüksək əhali artımı səbəbindən ölkədə doğumu nəzarətdə saxlayan Çin hökumətinə dünyaya 11 uşaq gətirməklə də qarşı çıxıb...

Adnan isə Sizin yeganə övladınızdır. Ziyalı, normal təminatlı bir mühitdə böyüdüyünü bilirəm. Xaricdə təhsilini davam etdirmək istəyirdi. Amma bundan əvvəl əsgərliyə getdi. Görünür, rejimlərdə Adnan kimi intellektlərin əsgər getməsindənsə, ölkədən çıxıb getməsi daha xeyirlidir.

Adnanı həmişə öz məktəbli oğluma nümunə göstərmişəm. Bir azdan onun tələbə həyatı başlayacaq. Onu qarşıda necə həyat gözləyir? Bu sual məni çox narahat edir...

Diktaturaların tarixi göstərir ki, hakimiyyəti ələ keçirmiş ailələr ölkənin gələcək sahibi olaraq yalnız öz övladlarını görmək istəyirlər. Yaşadığı ölkənin gələcəyini layiqli insanlara vermək arzusunda olan Adnan kimi gənclər o baxımdan “qorxulu” sayılır.

Diktat rejimlərin isə sonu yoxdur. Qadınların ayağa qalxdığı yaxın tarixdə bunun açıq reallıqlarını gördük. Ölümüylə Pakistan rejiminin sonunu gətirən Benəzir Bhuttonu, Çində öz haqları üçün tankın üstünə yeriyən Uyğur analarını, İranda demokratiya naminə ürəyini gülləyə nişan qoyan gənc tələbə Nidanı gördük. Bu dava uzun sürə bilər...Üç il, beş il, on il...

Bizə gəlincə...Ətrafda heç nə baş vermirmiş kimi öz dünyasını yaşayan duyğusuz adamlar Sizi ruhdan salmasın! Həyatda hər kəsin öz missiyası var. Demək ki, bizim mübarizəmizi davam etdirmək də övladlarımızın öhdəsinə düşüb. Sizin kimi kimi insanlar, sizin kimi ailələr, sizin kimi analar bu ölkənin ən böyük dəyəridir. Sizdən möhkəm olmağı xahiş edirəm. Bu ölkədə heç kəsin şərdən sığortası yoxdur. Bir gün övladlarımızı həbs etsələr, bizə də təsəlli gərək olacaq...

Məqalə Azadlıq qəzetinin 14 iyul 2009-cu il tarixində nəşr olunub

Atası deyir ki, Adnan Hacizadədən heç bir xəbər yoxdur

İyulun 13-ü OL Azərbaycan Gənclər Hərəkatının təsisçilərindən Adnan Hacızadənin doğum günüdür. Gənc fəal 26 yaşını həbsxanada - Bakı İstintaq Təcridxanasında qarşılayır.

A.Hacızadənin atası, politoloq Hikmət Hacızadə bu gün “Media forum” saytına açıqlama verib. O deyib ki, iyulun 12-də oğluna yemək ötürə biliblər: “Ancaq görüşməyə imkan verilmədi. Onun hansı şəraitdə, neçə adamlıq kamerada saxlandığını öyrənə bilmədik. Bu haqda heç bir məlumatımız yoxdur”.

1983-cü ildə Bakıda anadan olmuş A.Hacızadə ABŞ-ın Riçmond Universitetini bitirib. “BP-Azərbaycan” şirkətində işləyir. İyulun 8-də polis onu digər gənclər fəalı - AN Sosial Şəbəkəsinin yaradıcısı Emin Milli ilə birgə saxlayıb. Buna həmin gün axşam Bakıdakı “Livan” restoranında baş verən dava səbəb olub. Yeddi gənclə birlikdə yemək yeyən E.Milli və A.Hacızadə ilə qonşu masada olan Vüsal Məmmədov və Babək Hüseynov arasında düşən davaya görə Cinayət Məcəlləsinin 221.2.1 maddəsi (bir qrup şəxs tərəfindən törədilən xuliqanlıq) üzrə cinayət işi başlanıb. E.Milli və A.Hacızadə şübhəli şəxs qismində saxlanılıblar. İyulun 10-da Səbail Rayon Məhkəməsi A.Hacızadə və E.Milli barəsində iki aylıq həbs-qətimkan tədbiri seçib.

http://mediaforum.az/articles.php?lang=az&page=00&article_id=20090713110413745

Adnan, biz səninlə bərabər hələ çox güləcəyik!

Bir neçə aydan sonra tanış olmağımızın düz 11 ili tamam olacaq. Həmin günləri sentemental şəkildə xatırlamaq həvəsi yaransa da, buna indi vaxt sərf etməyi lazımlı bilmirəm. Bir onu bilirəm ki, 11 il öncə səninlə tanış olanda şüuraltı anlamışdım ki, həyatımın yaddaqalan simalarından biri olacaqsan.

Elə də oldu. Universitetə bir hazırlaşdıqdan sonra, uzun müddət uzaqdan, gec-gec ünsiyyətdə olsaq da, forumlar, internet vasitəsilə əlaqə saxladıq, sonra eyni təşkilatın üzvü olduq, iş yoldaşı olduq və ən əsası yaxın dost olduq. Hər şeyimi etibar edə biləcəyim bir adam oldun.

Sən mənim yeganə dostumsan ki, sənə az dala qan qohumu kimi bağlanmışam. Sənə həmişə olmayan qardaşım kimi yanaşmışam. Bəlkə də ona görə səni heç vaxt tərifləməmişəm. Özün bilirsən, qardaşlar bir biri ilə hər zaman rəqabət aparıblar. Amma indi qibtə etdiyim xüsusiyyətlərin haqqında susa bilmiyəcəm.

Mənə sual versələr ki, vicdan deyəndə ağlıva ilk nə gəlir? Düşünmədən adıvı çəkərəm. Bu vicdan anlayışı sənin qanında həmişə olub. Səni tanıdığım bu 11 il ərzində bir dəfə də sənin cığallığını, yalan danışmağını, insanı atmağını görmədim. Görə də bilməzdim. Sən vicdansızlığın nə olduğunu bilmirsən.

Dünən forumların birində səni tanıyan bir xanım səni belə xarakterizə etmişdi: “Adnan, bu torpağın adamı deyil”. Səni bir cümlə ilə yalnız belə ifadə etmək olar. Ömründə rüşvət verməyən, yalan danışmayan, tanışlarını atmayan, maddi mənfəət güdməyən, ad-san axtarmayan, yalnız idealları uğrunda mübarizə aparan və son qəpiyinə qədər öz ideyalarının reallaşdırmağa sərf edən adam bu torpağın adamı ola bilməz.

Kaşkı, Azərbaycanın 20% vətəndaşı sənin kimi qərib olsun. Bəlkə onda mən səni burada tərifləmək məcburiyyətində qalmazdım.

Bilirsən ömründə böcəyə əl qaldırmayan insanı idmançıya zərər yetirdiyi haqqında deyən insanlar necə gülməli və aciz görsənirlər? Hayıf sən o mənzərini indi görə bilmirsən. Elə təəssüflənirəm ki, bu teatrı izləyə bilmirsən. Amma, eybi yox səninlə oturub pivə içərək bu teatrın bütün səhnələri haqda deyib güləcəyimiz gün uzaqda deyil. Sənə deyim ki, nəyi var güləcəksən.

Sən elə adamsan ki, şəhərdə gəzdiyin zaman qarşında gəzən iki-üç cavan gəncin yerə atdığı kağızı əyilərək qaldırıb zibil qabına kimi apara bilərsən. Düzünü desəm, bunu öz gözlərimlə görməsəydim heç vaxt inanmazdım.

Sən o az-maz gənclərdənsən ki, əlində xaricdə yaşamaq və işləmək imkanı ola-ola problemlərdə dolu ölkəyə qayıtdın. Mən bilərəkdən VƏTƏN yazmadım. VƏTƏN sənin kimi DAŞlarını həbsə basmaz.

Sən o az-maz gənclərdənsən ki, qeyri-zorakılıq prinsipilərini öz həyat prinsipi olmasına baxmayaraq, yaxşı məvacibli iş yerivi bir illik tərk edib ölkənin hərbi xidmətində oldun. Mən yenə VƏTƏN yazmadım. VƏTƏN öz oğulları ilə belə davranmaz.

Bizə həmişə deyirlər ki, “Soruşmayın ki, vətən sizə nə verib? Soruşun ki, siz vətənə nə vermisiniz?”. Qardaş, sən bəlkə yeganə adamsan ki, vicdan təmizliyi ilə VƏTƏNdən hər şey soruşa bilərsən. Çünki sənin hər günün bu ölkənin vətənə çevrilməsi üçün irəli gedən bir gündür.

Qardaş, əgər tanrı mənə oğul bəxş etsə, istərdim ki, o sənə bənzəsin! Səni sevirəm, qardaş!

Vüqar Salamlı