“Manatın aqibəti necə olacaq?” mövzusunda interkativ mühazirə

Martın 31-i OL! Azərbaycan Gənclər Hərəkatı növbəti interaktiv mühazirəsini keçirdi. Bu dəfəki mühazirənin mövzusu “Manatın aqibəti necə olacaq?” idi. Qeyd edək ki, bu mövzu son aylar cəmiyyət tərəfindən diqqətlə izlənilir. İnteraktiv mühazirənin spikerləri İqtisadi Təşəbbüslərə Yardım İctimai Birliyinin sədri Azər Mehtiyev və Milli Sahibkarlar Konfederasiyasının prezidenti Ələkbər Məmmədov idilər.

İlk olaraq söz Azər Mehtiyevə verildi. O qeyd etdi ki, hökumət yanlış olaraq insanları inandırmağa çalışır ki, iqtisadi böhran bizə təsir etməyəcək: “Bizə böhran artıq təsir edib. Birinci təsir neftin qiymətlərinin aşağı düşməsidir. Azərbaycan iqtisadiyatı neftdən asılıdır, ona görə də bu birbaşa təsirdir. Neft gəlirinin azalması birbaşa təhlükə yaradır”.

Ələkbər Məmmədov isə öz növbəsində iqtisadi böhranın sahibkarlara ciddi təsir etdiyini bildirdi. Onun sözlərinə görə, sahibkarlar artıq təkliflər paketi hazırlayıblar: “Xarici banklarda olan vəsaitlərin bir hissəsi qaytarılmalı, Azərbaycan banklarına yatırılmalı və onun köməkliyi ilə insanlara kredit paylanılmalıdır.” Ələkbər Məmmədov ipoteka proqramının bərpasının vacibliyini vurğuladı.

Manatın aqibəti ilə bağlı hər iki ekspert birmənalı olaraq fikir söyləməyin mümkün olmadığını qeyd etdilər. Lakin Azər Mehtiyev öz şəxsi fikrini bildirdi: “Manatın məzənnəsinin əgər nə vaxtsa buraxılacaqsa, bunun daha tez baş verməsi lazımdır. Belə ki, bu prosesi gecikdirmək bizim pul ehtiyatlarımıza baha başa gəlir.” Azər Mehtiyevin sözlərinə görə məzənənin buraxılması indi baş versə, iqtisadiyyatı düzəltmək üçün dövlətin əlində vəsait olacaq: “Bu proses 1 ildən sonra baş verdiyi halda, iqtisadiyyatımızı bərpa etmək üçün əlimizdə heç nə qalmayacaq”.

Sonda spikerlər mühazirə iştirakçılarının suallarına cavab verdilər.

No comments: